Home » Prentsa oharrak. Iritzia

9 urteko kartzela eskaera Arantza Urkaregi lankidearentzat

Submitted by on 17/04/2012 – No Comment

EZ DUGU BESTE EPAIKETA POLITIKORIK ONARTZEN

Prestatzen ari diren elkartasun-ekintzetan eta salaketetan parte hartu

Datorren apirilaren 30ean, Auzitegi Nazionalak Zientzia eta Teknologia Fakultateko irakaslea eta gure lankidea den Arantza Urkaregi eta beste hamabi pertsonen aurka epaiketa politikoa zabalduko du. Fiskalaren eskaera, Arantzaren kasuan, bederatzi urteko kartzela zigorra da. Epaiketaren arrazoia Demokrazia 3 Milioi (D3M) hauteskunde plataforman parte hartzea izan da. Plataforma hori 2009ko martxoaren 1ean izan ziren hauteskunde autonomikoetan parte hartzeko sortu zen eta 47.000 sinaduraren babesa jaso zuen. Fiskaltzaren argudioa zera da: Partiduen Legeak Batasuna legez kanpo utzi zuenez, publikoki izen-abizen eta N.A.N ageriaz aurkeztea ETAren parte izatea dela.

Garai hartan Arantzaren eta beste kideen bi hilabeteko atxiloketa eta kartzela bidegabekeria antidemokratikoaren isla izan bazen, gaur egunean epaiketa politiko honen mehatxua askoz gogorragoa da.

UPV/EHUn ondo ezagutzen dugu Arantza; ezagutu eta maite. Orain dela 30 urte matematika irakaslea da, irakasle oso ondo baloratua. Gure unibertsitate honetan bai Klaustroari eta Gobernu Kontseiluari, zein sindikatu ekintzei denbora eta esfortzu handienak eskaini dizkie. Eta, gainera, jakin badakigu ez duela zerikusirik ETArekin eta D3Mren aurka egiten ari den akusazioa fartsa politiko hutsa dela.

Guk, UPV/EHUko bere lankideok, berarekin eta inputatuko beste pertsona guztiekin gure elkartasuna adierazi nahi dugu. Eta unibertsitate orok defendatzen duen egiaren eta justiziaren defentsan oinarrituz, bere absoluzioa eta Auzitegi Nazionalean  programatutako epaiketa politiko guztiak, hau barne, bertan behera gelditzea eskatzen dugu

 

Elkartasun ekintzak

Hori dela eta, UPV/EHUko langileei dei egiten diegu parte hartu dezatela datorren apirilaren 25an eguerdiko 13tan Leioako Mikel Laboa Plazan egingo den protesta kontzentrazioan.

Bestaldetik zure atxikimendua eman diezaiozun salaketa idazki honi email bat bidaltzen helbide honetara: stee-eilas.biz@ehu.es

Mezuaren gaia: Ez dut beste epaiketa politikorik onartzen